TUTAMKUMBUKA SUPREME NDALA KASHEBA

Mwanamuziki Ndala Kasheba ameaga dunia. Nimeamua kwa wiki moja sitamsikiliza mwanamuziki yeyote zaidi ya Ndala Kasheba. Kasheba aliingia Tanzania miaka ya 60 akiwa na bendi ya Orchestra Fauvette. Kasheba pamoja na kuwa ndio mwanzilishi wa mtindo ambao bado ninaupenda ile mbaya, Dukuduku Yee!, ni mwanamuziki wa kwanza Tanzania kudonoa gitaa la nyuzi 12. Ni baada ya kuzindua gitaa hili pale viwanja vya Mnazi Mmoja miaka ya 80, marehemu Kasheba alipachikwa jina la Supreme. Siku hiyo alivunja gitaa lake la nyuzi sita na kulivaa gitaa la nyuzi 12 ambalo alikuwa "akilinyanyasa" hadi alipofariki.

Moja ya nyimbo za marehemu ambazo zimewahi kuvuma sana ni ule wa Dezo Dezo alioutunga akiwa na bendi yake ya Zaita Musica. Wimbo huu ulikuja kurekodiwa na Tshala Muana. Katika wimbo huu anasema:
"Ewe mtoto wa kike, acha umbeya, mbeya...nitakusemea..."
"Unapenda dezo dezo...sigara hutaki kuacha...eh bwana we yatakushinda."

Nyimbo zake nyingine ni Marashi ya Pemba, Chunusi, Marinella, Nimlilie Nani, na Sungura Weba. Santuri yake ya mwisho iliitwa Yellow Card. Hii pia ni santuri yake ya kwanza kutolewa nchini Marekani. Wimbo wa Yellow Card aliuimba kufuatia uvumi kuwa amefariki kwa ukimwi. Katika wimbo huu anasema: "...hata wewe ni marehemu mtarajiwa."

Mara ya mwisho kumuona akifanya onyesho la hadharani (live) ilikuwa ni mwaka 2002 pale kwenye bustani za Mnazi Mmoja. Alipanda jukwaani na King Kiki na Babu Seya. kati ya mwaka 1994-97 nilikuwa nikihudhuria maonyesho yake ya usiku kule Sinza (nimesahau jina la ile klabu) ambapo tulikuwa tukipeperusha kitambaa cheupe. Onyesho la mwaka 2002 lilinidhihirishia kuwa kwa upigaji wa gitaa Tanzania, marehemu Kasheba hakuwa na mfano. Huyu bwana alikuwa akidonoa nyuzi kama vile anakunywa chai barazani huku akitazama wacheza bao. Tutamkumbuka daima.
Ukitaka kusikiliza baadhi ya nyimbo zake au kununua CD yake (hasa kwa walioko Marekani) kongoli hapa.